កំពង់ធំ)៖ អ្នកម្ដាយមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃអង្គារទី២៥ ខែវិច្ឆិកា ឆ្នាំ២០២៥ បានបន្តចាត់ឱ្យលោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា និងសហការីស្នាក់ការកណ្ដាល សហការជាមួយសាខាកាកបាទក្រហមកម្ពុជា ខេត្តកំពង់ធំ នាំយកអំណោយមនុស្សធម៌សម្រាប់ចែកជូនប្រជាជនងាយរងគ្រោះបំផុត មានដូចជា ចាស់ជរាឥតទីពឹង ស្ត្រីមេម៉ាយមានកូនច្រើន ជនពិការ កុមារកំព្រា និងអ្នកផ្ទុកមេរោគអេដស៍ សរុបចំនួន ៨១១គ្រួសារទៀត ដែលមកពី៩ក្រុង/ស្រុក ក្នុងខេត្តកំពង់ធំ។

ពិធីចុះផ្ដល់អំណោយជូនប្រជាជនងាយរងគ្រោះបំផុតទាំង ៨១១គ្រួសារនេះ បានធ្វើឡើងនៅទីតាំងចំនួន៣ក្នុងនោះ លោកស្រី ពុំ ចន្ទីនី អញ្ជើញចុះចែកចំនួន២ទីតាំង ដោយទីតាំងទី១ ស្ថិតនៅបរិវេណទីស្នាក់ការសាខាកាកបាទក្រហមកម្ពុជា ខេត្តកំពង់ធំ ចែកជូនដល់ប្រជាជនងាយរងគ្រោះបំផុតចំនួន ៤៨៤គ្រួសារ មកពីក្រុងស្ទឹងសែន ២០គ្រួសារ, ស្រុកសណ្តាន់ ១០០គ្រួសារ, ស្រុកប្រាសាទបល្ល័ង្ក ១០២គ្រួសារ, ស្រុកកំពង់ស្វាយ ១០៩ និងស្រុកប្រាសាទសំបូរ ៨៣គ្រួសារ និងទីតាំងទី២ ស្ថិតក្នុងបរិវេណសាលាស្រុកស្ទោងសម្រាប់ប្រជាជនងាយរងគ្រោះបំផុត ៨០គ្រួសារ។

ដោយឡែកទីតាំងទី៣ ស្ថិតក្នុងបរិវេណវត្តព្រៃតាត្រាវ ភូមិព្រៃតាត្រាវ ឃុំបល្ល័ង្ក ស្រុកបារាយណ៍ ក្រោមវត្តមាន លោកវេជ្ជបណ្ឌិត អ៊ុយ សំអុន នាយកនាយកដ្ឋានគ្រប់គ្រងគ្រោះមហន្តរាយ អញ្ជើញចុះចែកអំណោយជូនប្រជាជនងាយរងគ្រោះបំផុតចំនួន ២៤៧គ្រួសារ មកពីស្រុកសន្ទុក ៩០គ្រួសារ, ស្រុកបារាយណ៍ ៨៥គ្រួសារ និងស្រុកតាំងគោក ៧២គ្រួសារ។

ក្នុងពិធីសំណេះសំណាលនាឱកាសនោះ លោកស្រីអគ្គលេខាធិការ បានពាំនាំនូវប្រសាសន៍ផ្ដាំផ្ញើសាកសួរសុខទុក្ខ ដោយក្តីនឹករលឹក និងអាណិតស្រឡាញ់យ៉ាងជ្រាលជ្រៅពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះបងប្អូនប្រជាជនងាយរងគ្រោះទាំងអស់ ដែលបានអញ្ជើញមកទទួលអំណោយនាឱកាសនេះ។

លោកស្រីបានឱ្យដឹងទៀតថា កាកបាទក្រហមកម្ពុជា ក្រោមការដឹកនាំរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានយកចិត្តទុកដាក់ជាទីបំផុត ចំពោះប្រជាជនងាយរងគ្រោះនិងរងគ្រោះបំផុត ពិសេសពលរដ្ឋដែលមានជីវភាពខ្វះខាតគ្រប់រូបភាព ជាងនេះទៅទៀតអ្នកម្ដាយកាកបាទក្រហមកម្ពុជា ក៏តែងតែស្វះស្វែងរកដំណឹងពីគ្រប់ប្រភព ដើម្បីបានដឹងភ្លាមៗនឹងចុះទៅជួយសម្រាលការលំបាកភ្លាមៗបានទាន់ពេលវេលាជូនប្រជាពលរដ្ឋ។

ជាមួយគ្នានោះលោកស្រីក៏បានលើកឡើងពីប្រធានគណៈកម្មាធិការសាខា ថ្នាក់ដឹកនាំ មន្ត្រីប្រតិបត្តិសាខា-អនុសាខាកាកបាទក្រហមកម្ពុជា ខេត្តកំពង់ធំ ព្រមទាំងយុវជន និងអ្នកស្ម័គ្រចិត្តកាកបាទក្រហមកម្ពុជាទាំងអស់ ដែលបានយកចិត្តទុកដាក់គិតគូរពីសុខទុក្ខ និងជីវភាពរស់នៅរបស់បងប្អូនប្រជាជនដែលងាយរងគ្រោះបំផុតនៅក្នុងខេត្តកំពង់ធំ។ ហើយសម្រាប់អំណោយដែលបានផ្ដល់ជូនប្រជាពលរដ្ឋនាពេលនេះ គឺបានមកពីការបរិច្ចាគរបស់សប្បុរសជននានាពីគ្រប់មជ្ឈដ្ឋាន ដើម្បីជួយដល់ប្រជាពលរដ្ឋអ្នកដែលមានការខ្វះខាតពិតមែន។

នាឱកាសនោះលោកស្រីក៏បានផ្ដាំផ្ញើដល់ប្រជាពលរដ្ឋទាំងអស់ សូមថែរក្សាសុខភាពឱ្យបានល្អ ត្រូវស្រឡាញ់ខ្លួនឱ្យស្ងួនចំណី ប្រុងប្រយ័ត្នចំពោះជំងឺមិនឆ្លងដូចជា ជំងឺបេះដូងសរសៃឈាម ជំងឺមហារីក ជំងឺទឹកនោមផ្អែម និងជំងឺរលាកផ្លូវដង្ហើមរ៉ាំរៃជាដើម ដែលជំងឺទាំងអស់នេះបណ្តាលមកពីការបរិភោគអាហារប្រចាំថ្ងៃ ដែលមានជាតិប្រៃពេក ផ្អែមពេក ខ្លាញ់ពេក ការទទួលទានអាហារដែលគ្មានសុវត្ថិភាព ឬប្រើជាតិគីមី ការទទួលទានភេសជ្ជៈកំប៉ុង ជាពិសេសគ្រឿងស្រវឹង និងបារី កុំដុតសំរាមប្លាស្ទិក ដែលបណ្តាលឱ្យខូចសុខភាព និងបំពុលបរិស្ថានថែមទៀត។ ដូច្នេះសូមប្រជាពលរដ្ឋទាំងអស់ត្រូវ ថែទាំសុខភាពឱ្យបានល្អ ត្រូវអនុវត្តតាមសារអប់រំសុខភាពរបស់ក្រសួងសុខាភិបាល ដើម្បីជៀសផុតពីជំងឺផ្សេងៗ។

សូមជម្រាបក្នុងឱកាស អ្នកម្ដាយមនុស្សធម៌ ចាត់សហការីចុះសួរសុខទុក្ខ និងផ្ដល់អំណោយសម្រាលការលំបាកជូនប្រជាពលរដ្ឋនៅក្នុងភូមិស្រុកខាងលើនេះ នូវអង្ករ ៣០គីឡូក្រាម មី១កេស ត្រីខ១០កំប៉ុង ទឹកត្រី១យួរ និងឃីត១កញ្ចប់ (មុង ភួយ សារុង ក្រមា)៕