វ៉ាស៊ីងតុន ឌីស៊ី)៖ បន្ទាប់ពីធ្វើដំណើរទៅដល់ទីរដ្ឋធានីវ៉ាស៊ីនតុន ឌីស៊ី ដើម្បីបន្តបេសកកម្មទាក់ទាញ និងជំរុញវិនិយោគក្នុងទឹកដីនៃសហរដ្ឋអាម៉េរិក លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នាព្រឹកថ្ងៃទី៤ ខែវិច្ឆិកា ឆ្នាំ២០២៥ បានដឹកនាំគណៈប្រតិភូកម្ពុជា រួមមាន ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា និងក្រសួងពាណិជ្ជកម្ម ជួបពិភាក្សាការងារជាមួយលោក George A. Pickart នាយកគ្រប់គ្រងកិច្ចការរដ្ឋាភិបាល និងគោលនយោបាយសកលនៃក្រុមហ៊ុន GE Vernova ដែលជាក្រុមហ៊ុនឈានមុខគេផ្នែកបច្ចេកវិទ្យាថាមពល និងការអភិវឌ្ឍបណ្តាញអគ្គិសនីប្រកបដោយនិរន្តរភាព។

ជាកិច្ចចាប់ផ្តើមលោកឧបនាយករដ្ឋមន្ត្រី បានជម្រាបជូនលោក George អំពីចក្ខុវិស័យរបស់រាជរដ្ឋាភិបាលកម្ពុជា ក្នុងការកសាងប្រព័ន្ធថាមពលដែលមាន ស្ថិរភាព តម្លៃសមរម្យ និងជាមិត្តជាមួយបរិស្ថាន។ លោកក៏បានសង្កត់ធ្ងន់លើតួនាទីដ៏សំខាន់របស់ GE Vernova ក្នុងការជួយកម្ពុជាក្នុងការពង្រឹងហេដ្ឋារចនាសម្ព័ន្ធបណ្តាញអគ្គិសនី (Grid Solutions) ដើម្បីអាចទទួលយកថាមពលកកើតឡើងវិញ (Renewable Energy) ដែលស្របតាមបដិបទសកលនាពេលបច្ចុប្បន្ន។

ឆ្លៀតក្នុងឱកាសនេះ លោកឧបនាយករដ្ឋមន្ត្រី បានសំណូមពរឱ្យ GE Vernova ពិចារណាពង្រីកសកម្មភាពវិនិយោគបន្ថែមពីលើវត្តមានបច្ចុប្បន្នរបស់ GE នៅកម្ពុជា ដោយផ្តោតលើការផ្តល់នូវដំណោះស្រាយដូចជា ប្រព័ន្ធគ្រប់គ្រងថាមពលវៃឆ្លាត (Smart Grid Solutions) ជាមួយនឹងការនាំចូលបច្ចេកវិទ្យាគ្រប់គ្រង និងផ្ទុកថាមពល (Energy Storage) ដើម្បីបង្កើនប្រសិទ្ធភាពការប្រើប្រាស់ថាមពលទូទាំងប្រទេស។

ជាការឆ្លើយតបលោក George ដែលមានបទពិសោធន៍យ៉ាងទូលំទូលាយក្នុងកិច្ចការរដ្ឋាភិបាលសកល បានសម្តែងការកត់សម្គាល់ខ្ពស់ចំពោះវឌ្ឍនភាពសេដ្ឋកិច្ចរបស់កម្ពុជា និងបានឯកភាពថា ការអភិវឌ្ឍវិស័យថាមពលគឺជាគន្លឹះនៃកំណើនសេដ្ឋកិច្ចនាពេលអនាគត។ ក្នុងនាម GE Vernova លោកក៏បានបង្ហាញឆន្ទៈក្នុងការបន្តផ្តល់នូវការគាំទ្រផ្នែកបច្ចេកទេស និងការពិគ្រោះយោបល់ ដល់ស្ថាប័នពាក់ព័ន្ធរបស់កម្ពុជា ពិសេសលើការរៀបចំគោលនយោបាយថាមពលរយៈពេលវែង និងការអនុវត្តស្តង់ដារអន្តរជាតិ។

ជំនួបនេះបានសបញ្ជាក់អំពីការប្តេជ្ញាចិត្តរួមគ្នារវាងកម្ពុជា និង GE Vernova ក្នុងការបង្កើនកិច្ចសហប្រតិបត្តិការលើគម្រោងហេដ្ឋារចនាសម្ព័ន្ធសំខាន់ៗ។ ក្រុមប្រឹក្សាអភិវឌ្ឍន៍កម្ពូជា ក្នុងនាមជាសេនាធិការច្រកចេញចូលតែមួយរបស់រាជរដ្ឋាភិបាល នឹងបន្តសម្របសម្រួលយ៉ាងជិតស្និទ្ធជាមួយ GE Vernova ដើម្បីធានាថា គម្រោងវិនិយោគបច្ចេកវិទ្យាថាមពលទំនើបត្រូវបានអនុវត្តដោយជោគជ័យ ស្របតាមទិសដៅនៃការប្រែប្រួលអាកាសធាតុសកល៕