ក្នុងរយៈពេល១១ថ្ងៃ គិតចាប់ពីថ្ងៃទី២១ ដល់ថ្ងៃទី៣១ ខែមករា ឆ្នាំ២០២៥ សមត្ថកិច្ចបានបង្ក្រាបក្រុម ក្មេងទំនើងទូទាំងប្រទេសសរុបជាង១០ករណី និងក្របួចឃាត់ខ្លួនបានក្រុមក្មេងទំនើងជិត១០០នាក់ ដោយភាគច្រើនត្រូវបានបញ្ជូនទៅកាន់ពន្ធនាគារ និងមណ្ឌលអប់រំកែប្រែ ហៅដោយសាមញ្ញ «គុក»។ នេះបើតាមលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ។

បើតាមលោកបណ្ឌិត ទូច សុឃៈ ក្រោមបទបញ្ជាដ៏ម៉ឺងម៉ាត់របស់សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងដោយមានមរតកគោលនយោបាយភូមិ-ឃុំ-សង្កាត់មានសុវត្ថិភាព ជាបន្ទាត់គោលឯកឧត្តមអភិសន្តិបណ្ឌិត ស សុខា បានណែនាំថ្នាក់ដឹកនាំរាជធានី ខេត្ត ក្រុង ស្រុក ខណ្ឌ និងឃុំ សង្កាត់ រួមទាំងកម្លាំងនគរបាលជាតិ ទប់ស្កាត់ និងបង្ក្រាបក្មេងទំនើងឱ្យតឹងរឹងបំផុត តាមទស្សនៈ «ទំនើងមួយបង្ក្រាបមួយ ទំនើងពីរ បង្រាបពីរ»។

ក្នុងប្រតិបត្តិការបង្ក្រាបក្មេងទំនើងរយៈពេល១១ថ្ងៃចុងខែមករាដដែលនោះ បើធៀបនឹងករណីសរុប មូលដ្ឋានដែលក្មេងទំនើង ចេញអុកឡុកសង្គមច្រើន មានជាអាទិ៍ រាជធានីភ្នំពេញ ខេត្តកណ្តាល បាត់ដំបង ពោធិ៍សាត់ បន្ទាយមានជ័យ ក្រចេះ ស្វាយរៀង ខេត្តកំពត សៀមរាប កំពង់ស្ពឺ កំពង់ឆ្នាំង កំពង់ចាម ព្រៃវែង និងខេត្តតាកែវ។

បើតាមប្រមុខក្រសួងមហាផ្ទៃ អាជ្ញាធរ និងសមត្ថកិច្ច មិនអាចដោះស្រាយបញ្ហានេះផ្ដាច់មុខបានឡើយ ពោលគឺទាមទារចាំបាច់ការចូលរួមតាមដាន អប់រំណែនាំ និងរាយការណ៍ ពីឪពុកម្ដាយ អាណាព្យាបាល និងលោកគ្រូ អ្នកគ្រូជាដើម៕