ភ្នំពេញ)៖ ក្នុងឱកាសធ្វើសន្និសីទសារព័ត៌មានសង្ខេបព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» គិតត្រឹមម៉ោង០៤រសៀលថ្ងៃទី០៣ ខែសីហា ឆ្នាំ២០២៥នេះ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានបន្តបញ្ជាក់ថា កងកម្លាំងរបស់កម្ពុជាទាំង១៨រូប ដែលស្ថិតនៅក្រោមការគ្រប់គ្រងរបស់ថៃ ចាប់តាំងពីព្រឹកថ្ងៃទី២៩ ខែកក្កដា រហូតមកដល់ពេលនេះ គឺភាគីថៃ មិនទាន់បញ្ជូនមកកម្ពុជានៅឡើយទេ ក្រៅពីកម្លាំង២រូប ដែលទទួលបានកាលពីថ្ងៃទី០១ ខែសីហា ឆ្នាំ២០២៥។

អ្នកនាំពាក្យក្រសួងការពារជាតិ បានគូសបញ្ជាក់ថា៖ «កងកម្លាំងយើងទាំង១៨រូប ដែលស្ថិតនៅក្រោមការគ្រប់គ្រងរបស់ភាគីថៃ ចាប់តាំងពីព្រឹកព្រលឹមវេលាម៉ោង ៧៖៥០នាទី ថ្ងៃទី២៩ ខែកក្កដា ឆ្នាំ២០២៥ មកនោះ ភាគីថៃ មិនទាន់បានបញ្ជូនត្រឡប់មកកម្ពុជា វិញនៅឡើយទេ ក្រៅតែពីកងកម្លាំងយើងចំនួន២រូប ដែលមានរបួស យើងបានទទួលនៅនៅថ្ងៃទី១ ខែសីហា ឆ្នាំ២០២៥»។

អ្នកនាំពាក្យក្រសួងការពារជាតិ បានគូសបញ្ជាក់ថា កម្ពុជា នៅតែបន្តជំរុញឱ្យភាគីថៃ ប្រគល់កងកម្លាំងរបស់កម្ពុជា ដែលនៅសេសសល់ត្រឡប់មកវិញ ឱ្យបានាឆាប់រហ័ស ស្របតាមច្បាប់មនុស្សធម៌អន្តរជាតិ។

អ្នកនាំពាក្យក្រសួងការពារជាតិ រាជរដ្ឋាភិបាលកម្ពុជា កំពុងតែធ្វើការចរចា និងយកចិត្តទុកដាក់បំផុត ស្របពេលជាមួយគ្នានេះកម្ពុជា ក៏បានស្នើទៅប្រទេសម៉ាឡេស៉ី ដែលជាប្រធានអាស៊ាន ឱ្យជួយអន្តរាគមន៍ ដើម្បីជំរុញឱ្យភាគីថៃ ឆាប់ប្រគល់វីរកងទ័ពកម្ពុជា ឱ្យមកកម្ពុជាវិញផងដែរ។

អ្នកនាំពាក្យក្រសួងការពារជាតិ បានអះអាងថា ក្រសួងការពារជាតិ កងយោធពលខេមរភូមិន្ទ គឺមិនទុកសមាជិកណាម្នាក់ចោលនោះទេ ទោះក្នុងកាលៈទេសៈណាក៏ដោយ៕